អំពីមជ្ឈមណ្ឌលធម្មកម្ពុជា
«ធម្មកម្ពុជា» ដែលមានន័យថា «ព្រះធម៌នៅកម្ពុជា» ស្ថិតក្នុងភូមិរលួស ឃុំត្រពាំងព្រះ ស្រុកព្រៃឈរ ខេត្តកំពង់ចាម ព្រះរាជាណាចក្រកម្ពុជា។ មជ្ឈមណ្ឌលនេះស្ថិតក្នុងជនបទដែលមានចម្ងាយប្រមាណ ១១២គ.ម ពីរាជធានីភ្នំពេញ ឬ ប្រហែល ២០គ.ម ភាគពាយព្យក្រុងកំពង់ចាម។
មជ្ឈមណ្ឌលកាលពីដើមឡើយជាមជ្ឈមណ្ឌលវិបស្សនាដំបូងបំផុតនៅប្រទេសកម្ពុជាដែលបានបង្កើតឡើងនាពាក់កណ្ដាលទសវត្សរ៍ឆ្នាំ ១៩៩០ ក្នុងខេត្តកំពត ហើយបានផ្លាស់ប្ដូរទីតាំងរបស់ខ្លួនមកខេត្តកំពង់ចាមនេះ។ មជ្ឈមណ្ឌលធម្មកម្ពុជានៅខេត្តកំពង់ចាម បានបើកវគ្គសិក្សាដំបូងក្នុងឆ្នាំ ២០១៥។
សព្វថ្ងៃ មជ្ឈមណ្ឌលបើកវគ្គសិក្សា ១០ថ្ងៃ, សតិបដ្ឋាន និង វគ្គកុមារ ជារៀងរាល់ឆ្នាំ ។
ការធ្វើដំណើរទៅមជ្ឈមណ្ឌលវិបស្សនាធម្មកម្ពុជា
ពីភ្នំពេញ៖
ឡានក្រុង និង/ឬ រថយន្តទេសចរណ៍នឹងជូនអ្នកទៅដល់មជ្ឈមណ្ឌលធម្មកម្ពុជាដោយផ្ទាល់។ សូមទាក់ទងកក់កន្លែងតាមលេខ ០៧៧ ២៣៣ ៧៤៧។
បើអ្នកចង់ធ្វើដំណើរដោយខ្លួនឯងទៅមជ្ឈមណ្ឌលធម្មកម្ពុជា សូមធ្វើដំណើរតាមផ្លូវជាតិលេខ ៦ រួចប្ដូរទៅផ្លូវជាតិលេខ ៧ នៅស្គន់។ នៅពេលទៅដល់រង្វង់មូលត្រើង (គីឡូម៉ែត្រទី ១០៦) សូមបត់ឆ្វេង រួចធ្វើដំណើរតាមផ្លូវជាតិលេខ ៧១។ ប្រហែល ៦គ.ម ពីរង្វង់មូលត្រើង អ្នកនឹងឃើញស្លាកសញ្ញាមជ្ឈមណ្ឌលធម្មកម្ពុជានៅខាងឆ្វេងដៃ រួចបត់ឆ្វេងតាមស្លាកសញ្ញាបង្ហាញ ហើយបន្តធ្វើដំណើរតាមផ្លូវលំតូចនោះប្រហែល ១គ.ម ទៀត អ្នកនឹងឃើញមជ្ឈមណ្ឌល។
ពីកំពង់ចាម៖
សូមធ្វើដំណើរតាមផ្លូវជាតិលេខ ៧ ទិសដៅមកភ្នំពេញ។ នៅពេលទៅដល់រង្វង់មូលត្រើង (ប្រហែល ១៤គ.ម ពីក្រុងកំពង់ចាម) សូមបត់ស្ដាំ រួចធ្វើដំណើរតាមផ្លូវជាតិលេខ ៧១។ ប្រហែល ៦គ.ម ពីរង្វង់មូលត្រើង អ្នកនឹងឃើញស្លាកសញ្ញាមជ្ឈមណ្ឌលធម្មកម្ពុជានៅខាងឆ្វេងដៃ រួចបត់ឆ្វេងតាមស្លាកសញ្ញាបង្ហាញ ហើយបន្តធ្វើដំណើរតាមផ្លូវលំតូចនោះប្រហែល ១គ.ម ទៀត អ្នកនឹងឃើញមជ្ឈមណ្ឌល។